Божая прысутнасць
"Прыйдзіце да Мяне,
усе спрацаваныя і абцяжараныя,
і Я супакою вас."
Вось я, Пане,
прыходжу спазнаць Тваю прысутнасць.
Прагну прыняць Тваё ацаленне.
штодзённая малітва - 2023-03-21
Свабода
Бог дае мне дар свабоды.
Нават каб я быў у палоне,
мая душа – вольная.
Дапамажы мне, Пане,
выкарыстаць гэтую свабоду з мудрасцю.
Усведамленне
Ведаючы, што Бог любіць мяне безумоўна,
Я магу быць з Ім шчырым.
Як мінуў апошні дзень, і як я адчуваю сябе зараз?
Адкрыта і даверліва я дзялюся сваімі пачуццямі з Панам.
Слова Божае
Ян 5,1-3, 5-16
Было юдэйскае свята, і Езус прыйшоў у Ерузалем.
А ў Ерузалеме, каля Авечай Брамы ёсць купальня, якая па-габрэйску называецца Бэтэзда і якая мае пяць бабінцаў. У іх ляжала мноства хворых, сляпых, кульгавых, паралізаваных.
Быў там адзін чалавек, які хварэў трыццаць восем гадоў. Калі Езус убачыў, што ён ляжыць, і даведаўся, што ён хварэе ўжо доўгі час, кажа яму: Ці хочаш быць аздароўленым?
Хворы адказаў Яму: Пане, я не маю чалавека, які апусціў бы мяне ў купальню, калі ўзварушыцца вада. Пакуль я іду, іншы ўжо сыходзіць перада мною.
Езус кажа яму: Устань, вазьмі ложа сваё і хадзі. І адразу выздаравеў той чалавек, узяў ложа сваё і пачаў хадзіць.
А ў гэты дзень быў шабат. Таму юдэі сказалі аздароўленаму:
Сёння шабат, нельга табе насіць тваё ложа.
Ён адказаў ім: Той, хто аздаравіў мяне, сказаў мне: вазьмі ложа сваё і хадзі. У яго спыталіся: Хто той чалавек, які сказаў табе: вазьмі і хадзі? Але аздароўлены не ведаў, хто гэта быў, бо Езус знік у натоўпе, які быў у гэтым месцы.
Потым Езус знайшоў яго ў святыні і сказаў яму: Вось ты выздаравеў. Не грашы больш, каб не здарылася з табою чаго горшага. Чалавек гэты пайшоў, расказаў юдэям, што гэта Езус аздаравіў яго. Таму юдэі пераследавалі Езуса, бо Ён зрабіў гэта ў шабат.
Разважанні да сённяшняга Слова Божага
Active
Default
- Падчас малітвы наплываюць успаміны: крыўды мінулых гадоў, шкадаванні, страты і нягоды, усе турботы сэрца. Гэта так па-чалавечы. Мы – нібы той хворы чалавек, які трыццаць восем гадоў адлежыў ля купальні Бэтэзда. Усё, што Езус хоча ведаць, – ці мы хочам зрабіць крок наперад? Бо калі так, то адразу Яго аздараўляючая ласка і любоў павядуць нас, каб мы ішлі па жыцці крыху больш свабоднымі.
- Езус бачыў, што хворы быў там доўгі час; напэўна ягоны выгляд сведчыў аб тым, што ён нібы прыжыўся, асвоіўся з месцам. Калі Езус глядзіць на мяне, Ён можа таксама бачыць, што мне камфортна – нават у тых межах, на якія я скарджуся. Ці хапае ў мяне адвагі прасіць Езуса аздаравіць мяне? Са спачуваннем я малюся за ўсіх, хто лічыць сябе невылечным або непапраўным.
Размова
Пане, калі звяртаюся да Цябе,
я ведаю, што няма неабходнасці ў шматлікіх словах.
Ты бачыш маё сэрца.
Ты ведаеш мае жаданні і патрэбы.
Я аддаю сябе ў Твае рукі.
Заканчэнне
Я дзякую Богу за магчымасць правесці сам-насам з
Ім некалькі хвілін, а таксама за ўсялякае прасвятленне, што мне было дадзена
праз Пісанне.
Амэн
Мы будзем рады пачуць вашыя водгукі, прапановы і пажаданні, звязаныя з Прасторай малітвы.
- Прастора малітвы
- На галоўную
- Для разважання і малітвы
- Штотыднёвае разважанне
- Зваротная сувязь
- Напішыце, што вы думаеце пра Прастору малітвы
- Иезуиты в России
- Общество Иисуса в России и СНГ